სტრასბურგის სასამართლოს მიერ რუსეთის წინააღმდეგ საქართველოს სარჩელის დაკმაყოფილებაზე რუსეთის იუსტიციის სამინისტროში აცხადებენ, რომ სასამართლომ საქართველოს ბრალდებები 8-12 აგვისტოს განვითარებულ მოვლენებთან დაკავშირებით უსაფუძვლოდ მიიჩნია.

"საქმის, თითქმის, 12 წლიანი განხილვის შემდეგ, ადამიანის უფლებათა ევროპული სასამართლო მივიდა დასკვნამდე, რომ ადამიანის უფლებათა კონვენციით, იმ ინციდენტებსა და ძირითადი თავისუფლებების დარღვევებზე, რომლებსაც რუსეთის არმიის მიერ ქართული ჯარის თავდასხმისას ჰქონდა ადგილი რუსეთის სამშვიდობო ძალებსა და ადგილობრივ მოსახლეობაზე 8-12 აგვისტოს პერიოდში რუსეთს პასუხისმგებლობა ვერ დაეკისრება. სტრასბურგის სასამართლომ, ასევე, მხარი არ დაუჭირა საქართველოს ხელისუფლების მტკიცებას იმის შესახებ, რომ რუსეთის ჯარი სამხრეთ ოსეთის ტერიტორიაზე 7 აგვისტოს, ცხინვალზე თავდასხმამდე შეიჭრა", — წერია რუსეთის იუსტიციის სამინისტროს განცხადებაში.

იუსტიციის მინისტრის მოადგილისა და სტრასბურგის სასამართლოში რუსეთის წარმომადგენლის, მიხაილ გალპერინის თანახმად, ქართული მხარე ამ საქმეში ცდილობდა დაემტკიცებინა, რომ ადამიანის უფლებათა დაცვის ევროპული კონვენცია არამხოლოდ მშვიდობის, არამედ საომარი მოქმედებების დროსაც მოქმედებს, რაც, მისივე თქმით, საერთაშორისო ჰუმანიტარულ სამართალს ეწინააღმდეგება.

"ჩვენ შევძელით დაგვერწმუნებინა ევროპული სასამართლო, რომ 8-12 აგვისტოს პერიოდში რუსეთის შეიარაღებული ძალების მოქმედებების სამართლებრივი შეფასება სამხრეთ ოსეთსა და აფხაზეთში, მათ იურისდიქციას არ ექვემდებარება. ასევე, სასამართლოს მშვიდობიანი მოსახლეობის უფლებათა დარღვევის არცერთი ფაქტი რუსი სამხედროების მხრიდან 2008 წლის აგვისტოს მოვლენების დროს არ დაუდგენია", — აცხადებს მიხაილ გალპერინი.

რუსეთის იუსტიციის უწყება, აგრეთვე, ევროპული სასამართლოს ცალკეულ შეფასებებს არ ეთანხმება. მათ შორის, იმ ეპიზოდებშიც, რომელშიც საქმე ოკუპირებული აფხაზეთსა და ე.წ. სამხრეთ ოსეთში 2008 წლის 12 აგვისტოს შემდეგ მომხდარ ინციდენტებს, რომლებზეც სტრასბურგის სასამართლომ პასუხისმგებლობა რუსეთს დააკისრა. რუსეთის იუსტიციის სამინისტროს მტკიცებით, რომ რუსული მხარის ბრალეულობის მტკიცებულება წარდგენილი არ ყოფილა.

უწყებაში მიაჩნიათ, რომ სასამართლოს ამგვარი გადაწყვეტილება მათ მიერ ე.წ. ექსტერიტორიალური იურისდიქციის კონცეფციის გამოყენების შედეგია, რომლის შინაარსიც გაეროს საერთაშორისო სასამართლოსა და საერთაშორისო სამართლის საყოველთაოდ აღიარებულ პრინციპებს ეწინააღმდეგება.

განცხადებაში, ასევე, წერია, რომ ევროპული სასამართლოს განაჩენში რუსეთის წინააღმდეგ ფულადი კომპენსაციის დაკისრებაზე არაფერია წერია. მათივე თქმით, ზიანის ანაზღაურების საკითხი სასამართლომ შემდგომი განხილვებისთვის გადადო.

ადამიანის უფლებათა ევროპული სასამართლოს გადაწყვეტილება აგვისტოს ომის საქმეზე დღეს, 21 იანვარს გახდა ცნობილი. დიდმა პალატამ რუსეთის წინააღმდეგ საქართველოს ყველა ძირითადი სარჩელი დააკმაყოფილა.

კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა.

სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

აღნიშნული გადაწყვეტილება 17 მოსამართლისგან შემდგარმა სასამართლოს დიდმა პალატამ მიიღო, რომელიც არ საჩივრდება.

აგვისტოს ომის საქმეზე საქართველო რუსეთს ევროპული კონვენციის 8 მუხლის დარღვევაში ადანაშაულებდა. კერძოდ, საქართველო მიიჩნევს, რომ რუსეთმა ომისა და შემდგომი ოკუპაციის დროს დაარღვია ევროპული კონვენციის შემდეგი მუხლები:

  • სიცოცხლის უფლება;
  • წამების, არაადამიანური ან ღირსების შემლახველი მოპყრობის ან დასჯის აკრძალვა;
  • თავისუფლებისა და უსაფრთხოების უფლება;
  • პირადი და ოჯახური ცხოვრების დაცულობის უფლება;
  • სამართლებრივი დაცვის ქმედითი საშუალების უფლება;
  • საკუთრების დაცვა;
  • განათლების უფლება;
  • მიმოსვლის თავისუფლება.