პროკურორი ამირან გულუაშვილი აცხადებს, რომ ბრალდების მხარე დღესვე წარადგენს შუამდგომლობას სასამართლოში ნაციონალური მოძრაობის თავმჯდომარის, ნიკა მელიას დაპატიმრებასთან დაკავშირებით.

"მოქმედი კანონმდებლობის თანახმად, გათვალისწინებული არის სასამართლოსთვის შუამდგომლობით მიმართვა, რისი უფლებამოსილებაც გააჩნია ბრალდების მხარეს. შესაბამისად, დღესვე, ბრალდების მხარე უზრუნველყოფს შესაბამისი შუამდგომლობის წარდგენას თბილისის საქალაქო სასამართლოში", — განაცხადა გულუაშვილმა.

მისი თქმით, სასამართლო ვალდებულია რაც შეიძლება მალე დანიშნოს სხდომა.

"მოქმედი კანონმდებლობა ითვალისწინებს, რომ სასამართლომ შეძლებისდაგვარად მოკლე ვადაში, თუმცა საათობრივი შეზღუდვა დაწესებული არ არის, უზრუნველყოს შესაბამისი სხდომის გამართვა. კონკრეტულად როდის გაიმართება, მე, ბუნებრივია, წინასწარ ვერ გეტყვით", — ამბობს გულუაშვილი.

პროკურორი განმარტავს, რომ ბრალდებული ვალდებულია სასამართლო სხდომას დაესწროს, თუმცა აღნიშნავს, რომ მელიას გამოუცხადებლობა პროცესს ვერ შეაფერხებს.

ამირან გულუაშვილი ამობს, რომ პროკურატურის მიმართვის გათვალისწინება და მელიასთვის დეპუტატის იმუნიტეტის მოხსნა ნიშნავს, რომ ეს უკანასკნელი არ წარმოადგენს ინგულგენციას სისხლის სამართლის პასუხისმგებლობისთვის თავის ასარიდებლად.

"საქართველოს პარლამენტის დადგენილებით, კიდევ ერთხელ დადასტურდა ფაქტი, რომ სასამართლო გადაწყვეტილების, ისე, როგორც კანონის მოთხოვნების შესრულება, სავალდებულოა ყველა ადამიანისათვის, მიუხედავად მისი თანამდებობისა თუ პოლიტიკური კუთვნილებისა. საპარლამენტო იმუნიტეტი არ წარმოადგენს ინდულგენციას არცერთი ადამიანისთვის სისხლის სამართლის პასუხისმგებლობის თავიდან ასარიდებლად", — აცხადებს ამირან გულუაშვილი.

დღეს, 16 თებერვალს, ქართულმა ოცნებამ პლენარულ სხდომაზე ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება.

ენმ-ის ლიდერისთვის იმუნიტეტის მოხსნას 88 დეპუტატმა დაუჭირა მხარი. პარტია მოქალაქეების ლიდერებმა, ალეკო ელისაშვილმა და ლევან იოსელიანმა ხმა ამ გადაწყვეტილების საწინააღმდეგოდ მისცეს, ევროპელმა სოციალისტებმა — ავთანდილ ენუქიძემ, დავით ზილფიმიანმა, ფრიდონ ინჯიამ და გელა მიქაძემ კი თავი შეიკავეს და კენჭისყრაში მონაწილეობა საერთოდ არ მიიღეს.

სხდომას არ ესწრებოდა, თუმცა თავისი პოზიცია დააფიქსირა ქართული ოცნების დეპუტატმა, თეა წულუკიანმაც. მან თვითიზოლაციიდან ამცნო საზოგადოებას, რომ მომხრეა:

"ვიცი, რომ საქართველოს პარლამენტი ერთადერთ სწორ გადაწყვეტილებას მიიღებს და მავანის პოლიტიკანობაზე მაღლა დააყენებს კანონს და სახელმწიფოს! ჩემი ერთი ხმაც ამ გადაწყვეტილებას ეკუთვნის".

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.