ბოდბელი მთავარეპისკოპოსი იაკობი რუსთაველის გამზირზე ჰომოფობიური და ძალადობრივი ჯგუფების მიერ მედიის წარმომადგენლებზე ძალადობაზე პასუხისმგებლობას ჟურნალისტებსა და პრაიდის ორგანიზატორებს აკისრებს. მან, ასევე, თქვა, რომ ნებისმიერი აგრესია ძალიან საწყენია, მაგრამ "ეს არის იმ ფსიქოლოგიურ ტერორზე "პასუხი", რასაც ლგბტ თემი ახორციელებს".

"ამ ყველაფერზე პასუხისმგებელია პრაიდის ორგანიზატორები აბსოლუტურად. უნდა გაეთვალისწინებინათ რა მოხდებოდა. ჟურნალისტებმაც ისე უნდა გააშუქოთ, რომ ხალხში, ზოგიერთ კატეგორიაში, აგრესია არ გამოიწვიოთ. ძალიან საწყენია ნებისმიერი აგრესია, მაგრამ ეს არის იმ ფსიქოლოგიურ ტერორზე "პასუხი", რასაც ლგბტ თემი ახორციელებს. ჟურნალისტებსაც და აქციის ორგანიზატორებსაც მოგიწოდებთ, რომ იყოთ წყნარად. ისე იყავით, რომ თავი შეაყვაროთ ხალხს. მე ვცემე ვინმე?" — განაცხადა მეუფე იაკობმა.

ჰომოფობიური და ძალადობრივი ჯგუფის წევრები ჟურნალისტებს თავს ესხმიან. კონტრაქციის მონაწილეები მათ შორის დაუპირისპირდნენ On.ge-ს ჟურნალისტს. ის პარლამენტის წინ მიმდინარე მოვლენებს აშუქებდა, როცა რამდენიმე აგრესიულმა პირმა მას სიტყვიერი შეურაცხყოფა მიაყენა, ხელი ჰკრა და ცდილობდა ტელეფონი გადაეგდოთ.

ადგილზე მყოფმა პოლიციამ ისინი ჟურნალისტს მოარიდა, თუმცა არ დაუკავებია.

ასევე, ძალადობრივი და ჰომოფობიური კონტრაქციის მონაწილემ ტაბულას ჟურნალისტს თავში კეტი ჩაარტყა. ჟურნალისტი, მაკო ჯაბუა ადგილიდან პოლიციამ ადგილიდან განარიდა. დაშავებულები არიან რუსთავი 2-ისა და TV პირველის გადამღები ჯგუფები.


თბილისი პრაიდის კვირეული დღეს, 5 ივლისს ღირსების მარშით დასრულდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

დღეს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან არიან შეკრებილები და იმუქრებიან, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიჰყავთ ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

ამავე თემაზე: