ნაციონალური მოძრაობის შეფასებით, შინაგან საქმეთა სამინისტროს დღევანდელი განცხადება მიმართულია დაგეგმილი აქციის ხელშესაშლელად და წარმოადგენს მშვიდობიანი დემონსტრანტების დაკავებების დაანონსებას. ასე პასუხობს პარტია შსს-ს, რომელმაც თქვა, რომ დღეს საჭიროების შემთხვევაში პროპორციულ ძალას გამოიყენებენ.

"ყველას აქვს მშვიდობიანი შეკრებისა და მანიფესტაციის თავისუფლება. შესაბამისად, სახელმწიფოს ეკისრება ვალდებულება არა მხოლოდ დაიცვას მშვიდობიანი შეკრება, არამედ განახორციელოს სათანადო ღონისძიებები, პირთა მიერ ხსენებული უფლების ეფექტიანი რეალიზების უზრუნველსაყოფად", — აცხადებენ პარტიაში.

პარტიის თქმით, ყველა შესაბამისი უწყება 14 ნოემბერს საჯაროდ გააფრთხილეს, რომ მომდევნო დღეს მშვიდობიანი მსვლელობა იქნებოდა. მათი თქმით, ამის მიზანი იყო ის, რომ მოქალაქეთა უფლებების დასაცავად უწყებებს შესაბამისი ზომები მიეღოთ.

"ერთიანი ნაციონალური მოძრაობის მიერ საჯარო განცხადებით წინასწარ იქნა გაფრთხილებული ყველა შესაბამისი ორგანო, რომ ზემო ხსნებული მშვიდობიანი მსვლელობა გაიმართებოდა შეზღუდული დროის მონაკვეთში 15:00 საათიდან 17:00 საათამდე.

წინასწარი გაფრთხილების მექანიზმის არსებობის ერთადერთი მიზანია სახელმწიფო ორგანოებისათვის შესაძლებლობის მიცემა, მიიღოს სათანადო ზომები, რათა უზრუნველყოს შეკრებისა ან/და მანიფესტაციის უფლების განხორციელება", — აღნიშნავენ ენმ-ში.

ენმ შინაგან საქმეთა სამინისტროსა და შესაბამის სტრუქტურებს მოუწოდებს, რომ უზრუნველყონ შეკრების მშვიდობიანად ჩატარება და კანონით მათზე დაკისრებული ვალდებულებების შესრულება.

"კერძოდ, შეკრებებისა და მანიფესტაციების შესახებ საქართველოს კანონის მე-11 პრიმა მუხლის მე-5 ნაწილის მიხედვით, "შეკრების ან მანიფესტაციის მონაწილეთა რაოდენობიდან გამომდინარე, ტრანსპორტის სავალი ნაწილის გადაკეტვის აუცილებლობის შემთხვევაში, შესაბამისი მუნიციპალიტეტის აღმასრულებელი ორგანო ვალდებულია უზრუნველყოს მათი უსაფრთხოება და ტრანსპორტის სავალი ალტერნატიული მარშრუტის განსაზღვრა", — ვკითხულობთ განცხადებაში.

დღეს შინაგან საქმეთა სამინისტრო ოპოზიციის მიერ დაანონსებულ თბილისის ორივე სანაპიროზე გზების გადაკეტვაზე განაცხადა, რომ კანონის თანახმად, ტრანსპორტის სავალი ნაწილის გადაკეტვა დაუშვებელია და ამ წესის დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად.

შსს-ს თანახმად, საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებენ.

ნაციონალური მოძრაობის თავმჯდომარის, ნიკა მელიას განცხადებით, დღეს, 15 ნოემბერს თბილისის ორივე სანაპიროზე გზას გადაკეტავენ. მან აქცია 14:00 საათზე დააანონსა. აქციის მონაწილეები მეტრო ავლაბართან შეიკრიბებიან, რის შემდეგ მოეწყობა მსვლელობა და გადაიკეტება საავტომობილო მოძრაობა თბილისის ორივე სანაპიროზე.

მელიას თქმით, ესმის, რომ ეს გარკვეულ დისკომფორტს შეუქმნის მოქალაქეებს, მაგრამ აღნიშნა, რომ ეს არის ძლიერი გამაფრთხილებელი სიგნალი რეჟიმისთვის, რომ არაძალადობრივი საპროტესტო მოძრაობა ყოველ დღე უფრო მწვავე გახდება.