შინაგან საქმეთა სამინისტროსთან შშმ მოზარდზე ძალადობის გასაპროტესტებელ აქციაზე აქტივისტი ნატა ფერაძე დააკავეს. პოლიცია აქტივისტებს სტიკერების გაკვრის უფლებას არ აძლევდა და ვითარება ამ დროს დაიძაბა.

ამასთანავე, აქციაზე დაშავდა აქტივისტი შუშანა მაცაბერიძე. მისი თქმით, სამართალდამცავმა მუცელში ჩაარტყა. ადგილზე სასწრაფო დახმარება გამოიძახეს.

On.ge დამატებითი ინფორმაციისთვის შსს-ს დაუკავშირდა და მათ პასუხს მიღებისთანავე შემოგთავაზებთ.


კადრები, სადაც ჩანს, რომ პოლიციელი მოქალაქეს სცემს, გუშინ, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.

განახლება: მოგვიანებით ნატა ფერაძემ ფეისბუქგვერდზე დაწერა, რომ თავისუფალია.