თბილისის საკრებულოს დღევანდელი სხდომა კიევისა და უკრაინელი ხალხის მხარდამჭერი განცხადებით გაიხსნა. ფრაქცია ქართული ოცნების მიერ პარლამენტში დაინიცირებული რეზოლუციის მსგავსად, რუსეთის აგრესია არც ამ მიმართვაშია ნახსენები, ამიტომ, მას საკრებულოს ოპოზიციონერი წევრების ნაწილი ხელს არ აწერს.

გთავაზობთ განცხადებას სრულად:

"ძვირფასო კოლეგებო, ქალაქ თბილისის საკრებულოს წევრებს, გვსურს სრული მხარდაჭერა გამოვხატოთ ჩვენი მეგობარი ქალაქის კიევის და ჩვენი მეგობარი უკრაინელი ხალხის მიმართ.

ჩვენ ერთგულები ვართ საერთაშორისო სამართლის პრინციპებზე დაფუძნებული საერთაშორისო წესრიგისა და საერთაშორისო საზოგადოების საყოველთაოდ აღიარებული ნორმების, მათ შორის, რა თქმა უნდა, საზღვრების ურღვევობისა და ტერიტორიული მთლიანობის პრინციპებისა.

გამოვხატავთ ღრმა შეშფოთებას უკრაინის გარშემო მიმდინარე მოვლენების გამო, რაც ახალი საფრთხის რისკებს უქმნის არა მხოლოდ უკრაინის, არამედ რეგიონულ მშვიდობასა და უსაფრთხოებას. ვგმობთ ყოველგვარ განზრახვას, რომელიც სუვერენული სახელმწიფოს სუვერენიტეტისა და ტერიტორიული მთლიანობის წინააღმდეგ შეიძლება იყოს მიმართული.

აქვე ვაცხადებთ, რომ სამხედრო-პოლიტიკურ ალიანსში გაწევრიანება არის სუვერენული სახელმწიფოს სუვერენული უფლება და სამხედრო-პოლიტიკური ინსტრუმენტებით ამ უფლების შეზღუდვის ყოველგვარი მცდელობა კატეგორიულად მიუღებელია. დღეს, უკრაინაში შესაძლო ომის არდაშვება უნდა იყოს თითოეული ჩვენგანის და მთელი საერთაშორისო თანამეგობრობის უმთავრესი საზრუნავი.

სოლიდარობას ვუცხადებთ მეგობარ უკრაინელ ხალხს და ქალაქ კიევის რადას".

მიმართვას თბილისის საკრებულო კიევის საქალაქო საბჭოში უახლოეს დღეებში გააგზავნის.


გუშინ, 26 იანვარს ფრაქცია ქართულმა ოცნებამ უკრაინის მზარდამჭერი რეზოლუცია დააინიცირა, რომელშიც რუსეთი ნახსენები არ არის. რეზოლუციის შემუშავების იდეა ოპოზიციური ფრაქციებს ეკუთვნით. 24 იანვარს გამართულ ბრიფინგზე მათ მმართველ პარტიას ერთიანი ტექსტის შემუშავება შესთავაზეს. 26 იანვარს პარლამენტში რეზოლუციის ტექსტზე იმსჯელეს, თუმცა ვერ შეთანხმდნენ.

ოპოზიციონერი დეპუტატები აცხადებდნენ, რომ ქართულმა ოცნებამ მათ ტექსტის საკუთარი ვერსია წარუდგინა, სადაც შენიშვნები შეიტანეს და ძირითად პრინციპებზე შეთანხმდნენ. მათი ინფორმაციით, შესვენების დროს ქართულმა ოცნებამ რეზოლუციის თავდაპირველი ვერსია დააბრუნა. ტექსტში რუსეთი ნახსენები არ არის, ამიტომ ოპოზიციამ მის თანაავტორობაზე უარი განაცხადა.

ფრაქცია ქართული ოცნების თავმჯდომარე, მამუკა მდინარაძე ამტკიცებს, რომ "მცდელობა არ დაუკლიათ" სხვა პარტიების მოსაზრებებიც გაეთვალისწინებინათ. ის, ასევე, ამტკიცებს, რომ რეზოლუციის მათი ვერსიის "ყველა სიტყვა, ყველა ფრაზა გამომდინარეობს საქართველოს ეროვნული ინტერესებიდან" და დაცლილია პოპულისტური თუ პროვოკაციული რიტორიკისგან.

დღეს პარტია დროამ უკრაინის მხარდამჭერი რეზოლუციის ტექსტის ალტერნატიული ვერსია შეიმუშავა და ოპოზიციურ პარტიებს ხელმომწერებად მიიწვია. გარდა ამისა, იდენტური ტექსტით მათ პეტიციაც შექმნეს და რეზოლუციაზე ხელმოწერა პარტიების გარდა მოქალაქეებს, ინდივიდუალურადაც შეუძლიათ.