საქსტატის ინფორმაციით, იანვარში, ისევე როგორც დეკემბერში, წლიური ინფლაცია 13,9%-ს გაუტოლდა— ფასების დონის ზრდა ამაზე მეტად ბოლოს 2011 წლის მაისში დაფიქსირდა, როდესაც წლიური ინფლაციის მაჩვენებელი 14,3% იყო.

ამასთან, იანვარში, 2021 წლის დეკემბერთან შედარებით, ფასების საერთო დონე 1,1%-ით არის გაზრდილი.

ფოტო: საქსტატი

იანვარში წლიურ ინფლაციაზე ყველაზე დიდი გავლენა სურსათზე ფასების ზრდამ მოახდინა — ამ სასაქონლო ჯგუფში პროდუქცია წლიურად 16,2%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 5,27%-იანი წვლილი შეიტანა.

ასევე, უნდა ითქვას, რომ ბოლო ერთი წლის ჭრილში ფასები გაზრდილია თითქმის ყველა მსხვილ სასაქონლო ჯგუფში გარდა კავშირგაბმულობისა და ტანსაცმლისა.

წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

სურსათი და უალკოჰოლო სასმელები: ჯგუფში ფასები გაიზარდა 16,2%-ით, რაც წლიურ ინფლაციაზე 5,27 პროცენტული პუნქტით აისახა. ფასები მომატებულია შემდეგ ქვეჯგუფებზე: ბოსტნეული და ბაღჩეული (23,3%), პური და პურპროდუქტები (20,5%), ზეთი და ცხიმი (19,6%), მინერალური და წყაროს წყალი, უალკოჰოლო სასმელები და ნატურალური წვენები (18,3%), შაქარი, ჯემი და სხვა ტკბილეული (18,2%), თევზეული (16,6%), რძე, ყველი და კვერცხი (14,4%), ხილი და ყურძენი (13,7%), ხორცი და ხორცის პროდუქტები (11,9%), ყავა, ჩაი და კაკაო (7.8%);

საცხოვრებელი, წყალი, ელ.ენერგია, აირი: ჯგუფში დაფიქსირდა ფასების 44,8 პროცენტიანი მატება, რაც 3,69 პროცენტული პუნქტით აისახა წლიურ ინფლაციაზე. ფასები გაიზარდა ქვეჯგუფებზე: ელექტროენერგია, აირი და სათბობის სხვა სახეები (68%), წყალმომარაგება და საცხოვრებელთან დაკავშირებული სხვა მომსახურება (58%), საცხოვრებლის მიმდინარე მოვლა და შეკეთება (8,7%). ამასთან, ფასები შემცირდა საცხოვრებლის ფაქტიურ გადასახადზე (-3,1%);

როგორც ცნობილია, 2020 წლის იანვარში კომუნალურ გადასახადებზე სუბსიდია მოქმედებდა, შესაბამისად, 2021 წლის იანვარში კომუნალური ტარიფები შედარებულია 2020 წლის იმავე თვის სუბსიდირებულ ტარიფებთან, რაც იწვევს ზრდის შედარებით მაღალ მაჩვენებელს.

ტრანსპორტის ჯგუფში ფასები გაიზარდა 16,2%-ით, რაც 2,08 პროცენტული პუნქტით აისახა მთლიანი ინდექსის ზრდაზე. ფასები, ძირითადად, მომატებულია პირადი სატრანსპორტო საშუალებების ექსპლუატაციაზე (23,3%).

მაღალი ინფლაციის საპასუხოდ, საქართველოს ეროვნული ბანკი მონეტარულ პოლიტიკას გამკაცრებულ რეჟიმში ტოვებს. გუშინ, 2 თებერვალს, მონეტარული პოლიტიკის კომიტეტმა რეფინანსირების განაკვეთის უცვლელად, 10,5%-ზე დატოვების გადაწყვეტილება მიიღო.

სებ-ის ინფორმაციით, მთლიანობაში, 2021 წლის პირველი ნახევრიდან მოყოლებული მაღალ ინფლაციას სურსათის, ნავთობისა და ტრანსპორტირების საერთაშორისო მასშტაბით გაზრდილი ფასები განაპირობებს. მათი თქმით, მაღალი ინფლაცია, მეტწილად, სწორედ იმპორტირებული საქონლიდან მომდინარეობს, რაც საერთაშორისო ბაზრებზე აშშ დოლარით გამოხატული ფასების ზრდით არის განპირობებული.

ეროვნულ ბანკში იმასაც აღნიშნავენ, რომ ლარის ნომინალური ეფექტური გაცვლითი კურსის ბოლოდროინდელი გამყარება საერთაშორისო ბაზრებიდან მომდინარე წნეხს გარკვეულწილად არბილებს.

სებ-ში პროგნოზირებენ, რომ, სხვა თანაბარ პირობებში, ინფლაცია მიმდინარე წლის გაზაფხულიდან ეტაპობრივ კლებას დაიწყებს და წლის ბოლოსთვის მიზნობრივ მაჩვენებელს დაუახლოვდება.

როგორც ცნობილია, ინფლაციის მიზნობრივი მაჩვენებელი 3%-ია.