საზოგადოებრივი მაუწყებლის ახალმა გენერალურმა დირექტორმა ვასილ მაღლაფერიძემ მაუწყებლის სამწლიანი განვითარების გეგმა წარადგინა.

მაღლაფერიძის განცხადებით, მისი მთავარი მიზანია, "საზოგადოებრივი მაუწყებლის კრიზისიდან გამოყვანა და მდგრადი განვითარების საფუძვლის შექმნა".

მაღლაფერიძის თქმით, მაუწყებელი იმყოფება კრიზისში, რაც შემდეგი გეგმით უნდა დაიძლიოს:

  • მაუწყებლის ყველა პლატფრომაზე ყველა გადაცემისა და ყველა წარმოების შეჩერება საინფორმაციო გამოშვებების გარდა;
  • თანამშრომელთა რაოდენობის ოპტიმიზაცია;
  • გამოთავისუფლებული თანხების მიმართვა მატერიალურ-ტექნიკური ბაზის განსაახლებლად;
  • მაუწყებლის ყველა სეგმენტში კონკურენციის პრინციპზე გადასვლა

საზოგადოებრივი მაუწყებლის დირექტორის თქმით, ტელევიზიაში ერთ-ერთი ძირითადი პრობლემაა ამორტიზებული შენობა:

"ამჟამინდელი შენობა ვერანაირ ტექნოლოგიურ ჩარევას ვერ გაუძლებს, შეუძლებელია რემონტის ჩატარებაც".

მისივე თქმით, პრობლემაა ისიც, რომ არქივი ინახება არასათანადო პირობებში და არსებობს მისი განადგურების რისკი.

ახალი დირექტორი მიუთითებს იმაზეც რომ, საზოგადოებრივ მაუწყებელს არ გააჩნია არცერთი რეგიონული ოფისი და რომ ამჟამინდელი ბიუჯეტი არ არის ორიენტირებული განვითარებაზე:

"2006-დან 2016 წლამდე 410 მილიონია დახარჯული და აქედან, მხოლოდ 5 პროცენტი - ტექნიკაზე".

ახალმა გენერალურმა დირექტორმა ასევე რეიტინგზე გაამახვილა ყურადღება და აღნიშნა, რომ შიდა კვლევით საზოგადოებრივი მაუწყებელი ყოველწლიურად კარგავს მაყურებელს:

"წლიდან წლამდე რეიტინგი მიდის ქვემოთ. ჩვენი მონაცემებით, გარდაუვალია ტექნიკური კოლაფსი და მაუწყებლობის შეწყვეტა".

საბიუჯეტო გეგმა

ვასილ მაღლაფერიძის გეგმით, 2017 წელს, ოპტიმიზაციის შედეგად 15 მილიონი ლარი გამოთავისუფლდება, 2017-2019 წლებში კი, ახალ შენობაზე, რეგიონულ ოფისებზე, ტექნიკურ და ტექნოლგიურ გადაიარაღებაზე და არქივის გაციფრულებაზე, დაიხარჯება დაახლოებით 45 მილიონი ლარი.

ინფრასტრუქტურა

დაგეგმილია 9 რეგიონული ოფისის შეძენა და აღჭურვა, მულტიმედიური საინფორმაციო სამსახურის შექმნა, ტექნიკური და ტექნოლოგიური გადაიარაღება ტელევიზიაში და თანამედროვე ვებ-საიტის შექმნა.

სავარაუდო თარიღები

საზოგადოებრივი მაუწყებლის ახალი გენერალური დირექტორი ვარაუდობს, რომ 2018 წლის ბოლომდე, ახალი შენობა მოეწყობა და ტექნიკურად აღიჭურვება. მისივე თქმით, რეგიონალური ოფისების შესყიდვა თუკი მესამე კვარტალში დაიწყება, დასრულდება 2018 წლის ბოლოს. ხოლო, ახალი სამაუწყებლო ბადის შექმნა შესაძლებელი გახდება 11 თვეში, ანუ გადაცემები დაიწყება 2018 წელს, 2019 წელს კი გავა მაქსიმალურ სიმძლავრეზე. ხოლო, 2019 წელი იქნება მართვის ახალი მოდელის დამკვიდრება.