და აი, ეს დღეც დადგა! უკვე ვიცით როდის იხილავს დღის სინათლეს ყველა დროის ერთ-ერთი ყველაზე პოპულარული და მასშტაბური სერიალი.

სამეფო კარის თამაშების ფინალური სეზონის პრემიერა HBO-ზე 14 აპრილს შედგება. ამის შესახებ ახალი ტიზერით გვამცნეს, რომელიც იმდენად ამაღელვებელია, რომ მისი ყურების დროს შეუძლებელია ტანში ჟრუანტელმა არ დაგიაროთ.

კადრში სტარკების საგვარეულო პანთეონს ვხედავთ და გვესმის კეტლინის, ლიანასა და ნედის ხმა. თითოეული მათგანი ჯონზე საუბრობს. იქ მყოფი სანსა, ჯონ სნოუ და არია კი საკუთარ საფლავს აწყდებიან. სწორედ ამ დროს ვხედავთ, როგორ იყინება კადრში ყველაფერი, ვინტერფელის ლორდი და მისი ოჯახი კი მთავარი ბრძოლისთვის ემზადებიან.

ემის ისტორიაში ყველაზე მეტჯერ ნომინირებული სერიალის ფინალის გადასაღებად არხმა იმაზე ორჯერ მეტი თანხა გადაიხადა, ვიდრე ამას წინა სეზონში აკეთებდა. თანხის ზრდის მიზეზი გახდა ის ბატალური სცენები, რომლებსაც სერიალის ფინალში ვიხილავთ. ამ კონკრეტული ეპიზოდის გადაღებები 55 დღე გრძელდებოდა.

გარდა ამისა, გასათვალისწინებელია მსახიობების ანაზღაურებაც. როგორც იცით GOT-ის მსახიობები ტელევიზიის ისტორიაში ყველაზე მაღალანაზღაურებადი მსახიობები გახდნენ. ლინა ჰიდი, პიტერ დინკლეიჯი, ემილია კლარკი, კიტ ჰარინგტონი და ნიკოლაი კოსტერ-ვალდაუ HBO-სთან გაფორმებული ახალი კონტრაქტის მიხედვით სერიალის თითო ეპიზოდში $2,5 მილიონს მიიღებენ.

მოულოდნელი არავისთვისაა, მაგრამ არხის პროდიუსერმა დაადასტურა ისიც, რომ ფინალურ, მერვე სეზონში სერიალის რამდენიმე მთავარი პერსონაჟი კვდება.

"წინასწარ არც ერთ მსახიობს არ ჰქონდა წაკითხული სცენარი და ხმამაღალი კითხვის დროს სათითაოდ იგებდნენ, რომ მათი პერსონაჟი მოკვდა", — ამბობს ფრანცესკა ორსი.

ეს სიტყვები საკმარისი აღმოჩნდა იმისთვის, რომ მედიას აქტიურად დაეწყო განხილვა, თუ რომელი პერსონაჟი კვდება ფინალურ სეზონში. სერსეი? ტირიონი? ჯონ სნოუ? იქნებ ყველა ერთად?

7 იანვარს, HBO-მ 2019 წლის სატელევიზიო სეზონის პრომო გაავრცელა. სადაც ჩანს, რომ დეინერის ტარგარიენი ვინტერფელში ჩადის და სანსა სტარკს ხვდება. როგორც ამბობენ, მათი ურთიერთობა ფინალური სეზონის ერთ-ერთი უმთავრესი ინტრიგაა.

ამ დეტალის გარდა მერვე სეზონზე სხვა მნიშვნელოვანი ინფორმაციებიც გვაქვს. მაგალითად, გადასაღები მოედნიდან გავრცელებული კადრებით ვიცით, რომ ვინტერფელს კიდევ უფრო დიდი განსაცდელიც ელის და სამეფო ციხე ცეცხლის ალში გაეხვევა.

ფინალურ სეზონში სულ რაღაც ექვსი სერია იქნება, თუმცა, როგორც პროდიუსერები ამბობენ, თითოეული მათგანი 60 წუთზე მეტი ხანგრძლივობისაა და შეიძლება აღვიქვათ, როგორც არა ექვსი ეპიზოდი, არამედი ექვსი ფილმი.

გარდა ამისა, GOT-ის რეჟისორმა, დევიდ ნუტერმა მაყურებელი გაგვაფრთხილა, რომ იმაზე დიდი ტრაგედიების მომსწრენი გავხდებით, ვიდრე Red Wedding იყო.

ასე რომ, ისღა დაგვრჩენია დაველოდოთ 14 აპრილს და ვნახოთ, როგორ დასრულდება ტელევიზიის ისტორიაში ყველაზე დიდი ბრძოლა რკინის ტახტისთვის.