TV პირველის გადამღები ჯგუფი კულტურის, სპორტისა და ახალგაზრდობის სამინისტროში, თეა წულუკიანის ბრიფინგზე არ შეუშვეს. მაშინ როცა მედიების ნაწილი უკვე ესწრებოდა ბრიფინგს, TV პირველის ჟურნალისტი ცდილობდა გაერკვია, რატომ არ შეეძლო მას კითხვების დასმა მინისტრისთვის.

სამინისტროს თანამშორომელმა მას უთხრა, რომ ჰქონდათ სია, სადაც განსაზღვრული იყო რომელი მედია დაესწრებოდა ბრიფინგს. კითხვას, ჰქონდათ თუ არა მათ დავალება, რომ კონკრეტულად TV პირველი არ შეეშვათ, სამინისტროს თანამშრომელმა ასე უპასუხა:

"დავალება რა, ასე არ გავუფრთხილებივათ, უბრალოდ სია გვაქვს, ვინც უნდა შევიდეს".

მას შემდეგ რაც ჟურნალისტმა სიის ჩვენება ითხოვა, სამინისტროში განუმარტეს, რომ სია "ზეპირად იციან".

ცნობილია, რომ ბრიფინგზე წულუკიანმა სამი თეატრის სამხატვრო ხელმძღვანელს თანამდებობაზე ყოფნის ვადა გაუგრძელა.

აღსანიშნავია, რომ თეა წულუკიანის მიერ გამართულ ბრიფინგებზე მედიების ნაწილის აქამდეც არ უშვებდნენ. მაგალითად, 22 ნოემბერს ღონისძიებაზე არ შეუშვეს როგორც TV პირველის, ისე მთავარი არხის გადამღები ჯგუფი.

On.ge ცდილობს კულტურის სამინისტროსთან დაკავშირებას, თუმცა უწყებაში ჩვენს ზარებს არ პასუხობენ.