თბილისის საქალაქო სასამართლომ არ დააკმაყოფილა რუსთავი 2-ის დამფუძნებლების, ჯარჯი აქიმიძისა და დავით დვალის სარჩელი, რითიც ტელეკომპანია ქიბარ ხალვაშის საკუთრებაში დარჩა და რუსთავის 2-ის 60%-ს ყადაღა მოეხსნა. ადვოკატის, კახა კოჟორიძის განცხადებით, მოსამარლემ გადაწყვეტილება იმით ახსნა, რომ ქიბარ ხალვაში კეთილსინდისიერ შემსყიდველად მიიჩნია.

"ჩვენი მთელი პოზიცია აგებული იყო იმაზე, რომ სარჩელი, პირველ რიგში, არის ხანდაზმული და შესაბამისად, არ დასტურდებოდა გარკვეული ფაქტობრივი გარემოებები. ჩვენ ყოველთვის ხაზს ვუსვამდით იმას, რომ თუ ვინმესგან იძულებას ჰქონდა ადგილი, ეს ნამდვილად არ იყო ქიბარ ხალვაში და ქიბარ ხალვაშს არ შეიძლება სცოდნოდა იმ მომენტისათვის და ეს მის ჩვენებაშიც არის ასახული, რომ სისხლის სამართლის საქმეზე აქვს მიცემული, რომ მისთვის რაიმე ზეწოლაზე, იძულებაზე ცნობილი არ ყოფილა და შესაბამისად, მან შეიძინა ეს წილები", — განაცხადა რუსთავი 2-ის დირექტორმა, პაატა სალიამ.

ჯარჯი აქიმიძის განცხადებით, შოკში არიან, რადგან მათ ყველაზე ძლიერ არგუმენტზე მიიღეს პასუხი, რომ ყველაფერი ტყუილია. მისივე თქმით, აპირებენ, რომ ეს გადაწყვეტილება გაასაჩივრონ.

"აღმოჩნდა, რომ ჩვენ ასე თამაშ-თამაშით ჩავაბარეთ #1 ტელევიზიის 60% რაღაც თეთრებად და მერე სამაგიეროდ ქიბარ ხალვაშმა 4 მილიონი ჩემოდნით მიუტანა ვანო მერაბიშვილს და ამ ყველაფერზე მოსამართლემ თქვა, რომ ეს წესიერი საქციელიაო. ჩვენი ყველაზე სუსტი წერტილი იყო ხანდაზმულობა და ვფიქრობდით, რომ მოსამართლე ამ საქმეს გამოიყენებდა, მაგრამ, აი, პირდაპირ სახეში რომ შემოგილაწუნებს და გეტყვის, რომ თეთრზე-თეთრი კი არ არის, არამედ არის უშავესი და უკუნაპეტესი", — განაცხადა მან რადიო თავისუფლებასთან.

დაივით დვალმა და ჯარჯი აქიმიძემ ტელეკომპანია რუსთავი 2-ის წილის 60%-ის დასაბრუნებლად სასამართლოს 2019 წლის ოქტომბერში მიმართეს. ისინი აცხადებდნენ, რომ მას შემდეგ, რაც იძულებით დაათმობინეს მათივე დაფუძნებული კომპანიის 30-30%-იანი წილები, საკონტროლო პაკეტი პაატა კარსანიძემ შეიძინა, შემდეგ კი მისგან ქიბარ ხალვაშმა.

2020 წლის 17 იანვარს ცნობილი გახდა, რომ საქალაქო სასამართლომ განუხილველად დატოვა აქიმიძისა და დვალის სარჩელი, რომელიც ქიბარ ხალვაშისა და პაატა კარსანიძის მიმართ რუსთავი 2-ის წილის ნასყიდობის ხელშეკრულების ბათილად ცნობას, საჯარო რეესტრში წილის რეგისტრაციის გაუქმებასა და წილის მესაკუთრედ ცნობას ეხებოდა. მიზეზად სასამართლომ მოპასუხე მხარისთვის მასალების ჩაუბარებლობა დაასახელა.

2020 წლის 30 იანვარს კი აქიმიძე-დვალის სარჩელი სასამართლომ კვლავ წარმოებაში მიიღო და რუსთავი 2-ის ქონების 60%-ს ყადაღა დაედო.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში, ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც ხელისუფლების ზეწოლით, თავიანთი 30-30%-იანი წილები, ტელევიზიის დამფუძნებლებმა დავით დვალმა და ჯარჯი აქიმიძემ იძულებით გადაუფორმეს.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირების შემდეგ, მას სხვა ბიზნესებთან ერთად რუსთავი 2-ც ჩამოართვეს. საბოლოოდ, 2011 წელს, კომპანიის მფლობელები შპს საქართველო და ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ, ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ, დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.

ადამიანის უფლებათა ევროპული სასამართლოს გადაწყვეტილებით რუსთავი 2-ის 100%-იანი წილის მფლობელი ქიბარ ხალვაშია და საქართველოს სასამართლოებმა ყველა ინსტანციაზე კანონიერი გადაწყვეტილება მიიღეს. ამავე გადაწყვეტილებით გაუქმდა უზენაესი სასამართლოს საბოლოო გადაწყვეტილების აღსრულების შეჩერების დროებითი მექანიზმი. ამ მექანიზმით, 2017 წელს ქიბარ ხალვაშმა რუსთავი 2-ის წილები ვერ გადაიფორმა.