ამერიკის შეერთებული შტატების სახელმწიფო მდივნის, ენტონი ბლინკენის თქმით, პრეზიდენტი ბაიდენის განცხადებას ეთანხმება იმასთან დაკავშირებით, რომ ვლადიმერ პუტინი ომის დამნაშავეა.

"გუშინ პრეზიდენტმა ბაიდენმა თქვა, რომ მისი აზრით, ომის დანაშაულები ჩაიდინეს უკრაინაში. მე მას ვეთანხმები. მშვიდობიან მოსახლეობაზე განზრახ თავდასხმა ომის დანაშაულია. გასული სამი კვირის განმავლობაში განხორციელებული ნგრევის შემდეგ, მე მიჭირს იმის დამტკიცება, რომ რუსები ამის საწინააღმდეგოს აკეთებენ. მოსკოვის ომის შედეგები მთელ მსოფლიოში იგრძნობა", — განაცხადა ბლინკენმა.

მან, ასევე, თქვა, რომ შეერთებული შტატების ექსპერტები უკრაინაში ომის დანაშაულების დოკუმენტაციისა და შეფასების პროცესში არიან.

გუშინ ამერიკის შეერთებული შტატების პრეზიდენტმა, ჯო ბაიდენმა პუტინს ომის დამნაშავე უწოდა. როგორც CNN-მა დაწერა, პირველად დასმულ კითხვაზე — არის თუ არა პუტინი ომის დამნაშავე, ბაიდენმა უარყოფითი პასუხი გასცა. თუმცა, კითხვის დასაზუსტებლად ჟურნალისტებთან მიბრუნდა და როცა იგივე კითხვა გაუმეორეს, თქვა, რომ პუტინი ომის კრიმინალია.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში