"მინდა ვუთხრა ირაკლი კობახიძეს, შეეშვას ჩვენს გარდაცვლილ მეგობარზე ფეხების შეწმენდას", — ასე ეხმაურება TV პირველის დირექტორი, ვატო წერეთელი ქართული ოცნების თავმჯდომარის, ირაკლი კობახიძის ბრიფინგზე გაკეთებულ განცხადებებს.

"ეს სიბიძნურე, რასაც შენ შვები, არ გაგივა. 5 ივლისი და მედიაგარემო, ეს არის თქვენი განაჩენი, თქვენი და ბიძინა ივანიშვილის განაჩენი", — განაცხადა მან.

დღეს, 9 ივნისს კობახიძემ ევროპარლამენტის მიერ საქართველოზე რეზოლუციის მიღების შემდეგ, რომელშიც ბიძინა ივანიშვილისთვის სანქციების დაწესებაზეც არის საუბარი, თქვა, რომ დოკუმენტში ბევრი "ფაქტობრივი ტყუილი და უზუსტობაა". ერთ-ერთ მაგალითად კი მან ტექსტში ლექსო ლაშქარავაზე არსებული ჩანაწერი მოიხმო.

"რეზოლუციაში ვკითხულობთ, რომ ლექსო ლაშქარავა 5 ივლისს მიყენებული დაზიანებების შედეგად გარდაიცვალა, როდესაც გარდაცვალების რეალური მიზეზი საზოგადოებისთვის კარგად არის ცნობილი", — თქვა კობახიძემ.


დღეს ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.

ინფორმაციის გავრცელებას ქართული ოცნების თავმჯდომარის, ირაკლი კობახიძის ბრიფინგი მოჰყვა. კობახიძემ ევროპარლამენტარებს ე.წ ფეიკის მსხვერპლები უწოდა. ასევე, თქვა, რომ რეზოლუციაში არაერთი "ფაქტობრივი უზუსტობა და ტყუილია".

კობახიძემ დოკუმენტის შინაარსიც გააკრიტიკა, ივანიშვილის "მიღწევები" ჩამოთვალა და აღნიშნა, რომ "რეზოლუციას, რომელიც ივანიშვილის სანქცირებას ითხოვს, ჩალის ფასი აქვს". მმართველი პარტიის თავმჯდომარემ თქვა ისიც, რომ საქართველოსთვის, უკრაინისა და მოლდოვასთვის "კანდიდატის სტატუსის მინიჭებას არავითარი პრაქტიკული შედეგი არა აქვს".

კობახიძის განცხადებას უკვე მოჰყვა კრიტიკაც. სახალხო დამცველის, ნინო ლომჯარიას თქმით, ძალიან სუსტია არგუმენტი, რომ ევროპარლამენტარები ფეიკ ნიუსების მსხვერპლი არიან.