ბოლო დღეებია ბიძინა ივანიშვილის "დამსახურებებზე" საუბარი ისევ აქტუალური გახდა. მას შემდეგ, რაც ევროპარლამენტმა რეზოლუცია მიიღო, რომელშიც ქართული ოცნების დამფუძნებლისთვის სანქციების დაწესების მოწოდებაა, მმართველი გუნდის წევრებს საშუალება მიეცათ ივანიშვილი კიდევ შეექოთ და მადლიერება დაემტკიცებინათ.

ითქვა, რომ სამების ამშენებელი სანქციებს არა, თუმცა ღირსების ორდენზე მეტს ნამდვილად იმსახურებს. ამის პარალელურად, ევროპარლამენტის კრიტიკასაც არ მორიდებიან. "ოცნება" ფიქრობს, რომ ამ რეზოლუციას "ჩალის ფასი" აქვს. თუმცა ჩალა რა ღირდა არ ვიცოდით, სანამ ალუდა ღუდუშაურმა არ გვითხრა, რომ რეზოლუციას ნულის ფასი აქვს.

გადავწყვიტეთ, განსაკუთრებული ქება და კრიტიკა ერთად შეგვეგროვებინა. გადავხედოთ, რას ფიქრობს მმართველი გუნდი დასავლელ პარტნიორებზე და რას ივანიშვილზე.

1. კობახიძე: რეზოლუციას, რომელიც ივანიშვილის სანქცირებას ითხოვს, ჩალის ფასი აქვს

რა თქმა უნდა, ეს სია ირაკლი კობახიძის გარეშე ვერ ჩაივლიდა და სწორედ ის გახსნის. ქართულმა ოცნებამ რეზოლუციის მიღებიდან მალევე ბრიფინგი ჩანიშნა, სადაც პარტიის თავმჯდომარემ მის "უმნიშვნელობაზე" ისაუბრა. შემდეგ კი დამფუძნებლის "მიღწევები" ჩამოგვითვალა.

კობახიძემ იქვე იმედიც გამოთქვა, რომ როდესაც ევროკავშირის წევრი გავხდებით, "სხვაგვარი ევროპარლამენტი დაგვხვდება". მოქმედ ეპროპარლამენტარებს კი ფეიკ ნიუსების მსხვერპლი უწოდა.

ეს პოზიცია არაერთმა წევრმა გაიმეორა. მაგალითად, დეპუტატმა გია ვოლსკიმ ცოტა ფორმულირება შეცვალა და თქვა, რომ "ევროპარლამენტშიც არიან ადამიანები, ვინც ფეიკს ქმნიან". მას არც ევროპული გზის არჩევაში ივანიშვილის "ლომის წილის" ხსენება დავიწყებია.

2. მათიკაშვილი: რის სანქცირებას ითხოვენ, სამების ტაძრის?!

დიახ, ქართული ოცნების ერთ-ერთ წევრს, დავით მათიკაშვილს მიაჩნია, რომ ივანიშვილის დასანქცირება სამების დასანქცირებაცაა. განა მარტო სამების? ასევე, ღირსების გრძნობის და მრავალი სხვა რამისაც.

მისი აზრით, ივანიშვილი საკუთარ ქვეყანაზე და ხალხზე უზომოდ შეყვარებული და მოამაგეა. თქვა ისიც, რომ მისმა მოღვაწეობამ უდიდესი სიყვარული დათესა.

3. კახაძე: ივანიშვილმა თავისი ცხოვრებით დაიმსახურა ორდენზე მეტი

9 ივნისს შეიქმნა პეტიცია, რომლითაც ივანიშვილისთვის ორდენის მინიჭებას ითხოვდნენ. პეტიცია უკვე აღარ იძებნება, თუმცა დეპუტატი ლადო კახაძე ამბობს, რომ სიამოვნებით დაუჭერდა მხარს ამ ინიციატივას.

კახაძის გარდა, ივანიშვილისთვის ორდენის გადაცემის წინააღმდეგი არ არის არც კულტურის კომიტეტის თავმჯდომარე ელისო ბოლქვაძე.

4. ღუდუშაური: ამ რეზოლუციას, რომელიც ბატონი ივანიშვილის თითქოსდა სანქცირებას ეხება, ნულის ფასი აქვს

ამას ნამდვილად ვერ გამოვტოვებდით, ამიტომ იხილეთ ვიდეო, რომელშიც დეპუტატი ალუდა ღუდუშაური გვიხსნის, რისი ფასი აქვს ჩალას, უფრო ზუსტად, რეზოლუციას.

5. წულუკიანი: ბავშვმაც კი იცის, რომ ბიძინა ივანიშვილს ამ ქვეყანაში ძალიან ბევრი კარგი საქმე აქვს გაკეთებული

თანაპარტიელებთან ერთად ივანიშვილის მნიშვნელობა კულტურის მინისტრმა, თეა წულუკიანმაც შეგვახსენა და აქვე ისიც აღნიშნა, რომ არ არსებობს პლატფორმა, რომელიც დაიტევს მის სიკეთეზე საუბარს. მისი თქმით, ევროპარლამენტში სამასიოდე ევროპელია, რომლებიც თვლიან, რომ ივანიშვილს კარგი საქმეები არ გაუკეთებია.

6. ჩიქოვანი: ყველა უნდა იყოს პირნათელი იმ დამსახურების წინაშე, რომელიც გააჩნია ივანიშვილს

ივანიშვილის დამსახურებების მთხრობელთა სიაში იყო ირაკლი ჩიქოვანიც, რომელმაც გვითხრა, რომ ყველა პირნათელი უნდა ვიყოთ.

7. ბოლქვაძე: ბიძინა ივანიშვილის დამსახურება უკიდეგანოდ დიდია

კულტურის კომიტეტის ხელმძღვანელი ელისო ბოლქვაძე კი მიიჩნევს, რომ საქართველოს სწორ განვითარებასა და მშვიდობიანი ქვეყნის ჩამოყალიბებაში ექსპრემიერის დამსახურებები "უკიდეგანოდ დიდია". მან შეშფოთებაც კი გამოთქვა და კობახიძის მოსაზრება გაიმეორა, რომ ევროპარლამენტარები ფეიკს ემსხვერპლნენ.

8. კალაძე: ივანიშვილზე, რომელიც უამრავ კარგ საქმეს აკეთებს, როგორც ქველმოქმედი, როგორც მეცენტი, გვეუბნებიან, რომ ცუდი კაცია

თანაპარტიელებს არ ჩამორჩა არც თბილისის მერი კახა კალაძე. მან ივანიშვილის მნიშვნელობაზე ისაუბრა და თქვა, რომ არცერთ სიტყვას, რომელიც რეზოლუციაშია ნახსენები, არ ეთანხმება.

9. დავითულიანი: მთავარია, ქვეყანას არ დაუდგეს მძიმე პერიოდი და ივანიშვილი თვითონ გაგვამხნევებს

ამდენი ქების ფონზე, დეპუტატი ბექა დავითულიანი გვიმტკიცებს, თითქოს ივანიშვილს გამხნევება არ სჭირდება, პირიქით.

10. სამხარაძე: ივანიშვილმა გადაარჩინა საქართველო!

და ბოლოს, პარტიის კიდევ ერთი წევრს, დიმიტრი სამხარაძეს გონია, რომ ვიღაცებმა კარგად ვერ გაიცნეს საქართველო, რადგან "შიდა მტრის ნათქვამს იჯერებენ".

ქება-დიდების ამ ფრაზების ფონად ევროპარლამენტის კრიტიკით, მმართველი გუნდი მოსახლეობის ნაწილში ანტიდასავლური განწყობების გაღვივებას უწყობს ხელს. ერთ-ერთმა დეპუტატმა, დიმიტრი ხუნდაძემ ისიც კი თქვა, რომ თუ საქართველო სტატუსს უსამართლო ვალდებულებებით მიიღებს, ქვეყანამ მასზე უარი უნდა თქვას.

კონსტიტუციაში დეკლარირებული დასავლური კურსიდან ასეთ გადახვევას მალე მოყვა კრიტიკა. "ოცნებაში" პასუხად თქვეს, რომ ხუნდაძის აზრი პარტიის ოფიციალური პოზიცია არაა, თუმცა შემდგომ განცხადებებში მსგავსი ნარატივი თავადაც გაატარეს.

• ვოლსკი ხუნდაძეზე: პარტიის ოფიციალური პოზიცია არაა, თუმცა საზოგადოების დიდი ნაწილი ფიქრობს, რომ რეზოლუცია უსამართლოა
• ოხანაშვილი ხუნდაძეზე: ნუ გვისაყვედურებს ნურავინ, ჩვენ გვაქვს უფლება, გვქონდეს ემოცია
• კალაძე: აი, ის, ვითომ ქვეყნის მეგობრებად რომ გვევლინებიან, თავიანთი ქვეყნები ჩართონ ომში