ამერიკელმა მომღერალმა ბიონსემ დაადასტურა, რომ თავისი ახალი ალბომის — Renaissance-ის — ერთ-ერთი სიმღერის ტექსტს შეცვლის. გადაწყვეტილება მომღერალმა მას შემდეგ მიიღო, რაც შშმ პირების მხარდამჭერმა აქტივისტებმა და ორგანიზაციებმა იგი სიმღერაში ეიბლისტური ტერმინის გამოყენებისთვის გააკრიტიკეს.

კანადელ რეპერ დრეიკთან ერთად დაწერილ სიმღერაში Heated ბიონსემ ცერებრული დამბლის ერთ-ერთი ფორმის, კრუნჩხვითი პარაპლეგიის, აღმნიშვნელი დამამცირებელი ინგლისურენოვანი ტერმინი გამოიყენა. ტერმინი გაერთიანებულ სამეფოში შშმ პირების "აღმნიშვნელ" ერთ-ერთ ყველაზე შეურაცხმყოფელ სიტყვად მიიჩნევა.

ამის გამო მომღერალი, ცხადია, კრიტიკის ქარცეცხლში გაეხვა. ცოტა ხნის წინ კი ბიონსეს წარმომადგენელმა განაცხადა, რომ სიმღერის ტექსტი შეიცვლებოდა.

ამავე ტერმინის სიმღერაში გამოყენებისთვის რამდენიმე კვირის წინ გააკრიტიკეს ამერიკელი მუსიკოსი ლიზოც. მოგვიანებით, ლიზომ მოიბოდიშა და ასევე შეცვალა სიმღერის ტექსტი. ამასთან, მან განაცხადა, რომ "კარგად ესმის, რა ძალა აქვს სიტყვებს" და მისი განზრახვა არასდროს ყოფილა, შეურაცხმყოფელი ენის გამოყენებისთვის შეეწყო ხელი.

ავსტრალიელი მწერალი და შშმ პირების უფლებების მხარდამჭერი ჰანა დივინი მაშინ ერთ-ერთი პირველი იყო, ვინც ლიზო გააკრიტიკა. იგი პრობლემას ამჯერადაც შეეხო და კიდევ ერთხელ ისაუბრა, რატომ არის ეიბლისტური ენის გამოყენება მიუღებელი, განსაკუთრებით კი, მუსიკის ინდუსტრიაში.

დივინის თქმით, ბიონსეს შემოქმედებითი თავდადება არ ამართლებს ეიბლისტური ტერმინების გამოყენებას — "ენის, რომელსაც ძალიან ხშირად უგულბელყოფენ".

მომღერალი ასევე გააკრიტიკა ბრიტანულმა საქველმოქმედო ორგანიზაცია Sense-მა.

"სამწუხაროა, რომ კიდევ ერთი მუსიკოსი იყენებს შეურაცხმყოფელ ტერმინს თავის სიმღერაში; თანაც ძალიან მალე მას შემდეგ, რაც აღნიშნეს, რამდენად საზიანოა ეს სიტყვა", — განაცხადა ორგანიზაციამ და ხალხს მეტის გაგებისკენ მოუწოდა, რათა შეზღუდულ შესაძლებლობებზე საზოგადოების ცნობიერება ამაღლდეს.