იმ ეპოქაში, როცა ყველა თათბირი, ლექცია თუ უბრალოდ შეხვედრა ციფრულ ფორმატში ტარდება და როდესაც ამისთვის ძირითადად ვიდეო-ზარებს ვიყენებთ, ხშირად ჩნდება კითხვა — რა ჩავიცვა?

ონლაინ შეხვედრების მოსაწყობად ორგანიზაციები ხშირად სხვადასხვა ონლაინ საკონფერენციო პლატფორმას მიმართავენ, რომლებსაც საკმაოდ ბევრი საინტერესო შესაძლებლობა აქვთ.

ონლაინ საკონფერენციო პლატფორმების შესაძლებლობებს კრეატიული გამოყენება მოუფიქრეს ქართული აქსესუარების ბრენდ ჯოვანი მორაში.

ჯოვანი მორას ციფრული აქსესუარები გვაძლევს შესაძლებლობას ზემდეტი ძალისხმევის გარეშე ონლაინ ჩართვისთვის საუკეთესოდ გამოვეწყოთ — ბაფთა, შარფი, პერანგი, ახლა უკვე შეგიძლიათ ონლაინ შეხვედრები business casual სტილში ჩაატაროთ.

"ვფიქრობ, ეს პატარა ჟესტი რთულ პერიოდს გაგიხალისებთ და მეგობრებთან ერთად თავის დაბერების თუ ვირტუალური სკაფანდრის ჩამოცმის პარალელურად ახლა უკვე გაპრანჭვასაც მოახერხებ." — ნათქვამია ბრენდის ოფიციალურ ბლოგში.

ჯოვანი მორას ფილტრები უკვე ინტეგრირებულია ყველა ძირითად პლატფორმასთან, რომელსაც ვიდეო-ზარების განხორციელების მხარდაჭერა აქვს (Google Hangouts, Teams, Skype, Zoom).

ბრენდის რეალური პროდუქტების ციფრულად მორგება შესაძლებელი გახდა SnapChat-ის ფილტრების ოფიციალური სამუშაო პროგრამა Lens Studio-თი.

გამოყენების წესი

საკმარისია თქვენს კომპიუტერში დააყენოთ პროგრამა Snap Camera და სასურველ საკომუნიკაციო პლატფორმის კამერის კონფიგურაციაში აირჩიოთ იმავე დასახელების (Snap) ვირტუალური კამერა. ამის შემდეგ გაიხსნება Snap Camera, რომელშიც უნდა მოძებნოთ GiovanniMorra-ს სახელით გამოქვეყნებული ფილტრები და მაუსის ერთი კლიკით მოირგოთ, მოსინჯოთ და გამოეწყოთ საქმიანი შეხვედრისთვის ან ვირტუალური დაბადების დღისთვის.