Facebook-ისა და Messenger-ის მომხმარებლებს დღეს ამ აპლიკაციების გამოყენება უჭირთ. შეფერხება პირველი საათიდან დაიწყო.

DownDetector-ზე გამოქვეყნებული მონაცემების მიხედვით, დღეს Messenger-ის ასობით მომხმარებელს, ყოველ წუთას, აპლიკაციაზე წვდომის პრობლემა ჰქონდა. ერთ მომენტში, ერთდროულად 1200 მომხმარებელი წერდა, რომ Messenger-ში ვერ შედიოდა, ვერ გზავნიდა ტექსტურ შეტყობინებებს და ვერც ზარებს ახორციელებდა.

Messenger-ის პრობლემები ბოლო 24 საათში

Facebook-ის პრობლემები ბოლო 24 საათში

Facebook-ის მომხმარებელთა 42%-ს ავტორიზაციის გავლაზე ჰქონდა პრობლემა, 39%-მა საერთოდ ვერ შეძლო სოციალური ქსელის გამოყენება, 18% კი Newsfeed-ის ხარვეზებმა შეაწუხა.

რაც შეეხება Messenger-ს, მის მომხმარებელთა 55% მესიჯების მიღების პრობლემაზე წერდა, 30%-ს სერვერთან დაკავშირება უჭირდა, 13%-ს კი ავტორიზაციის გავლა.

"შეტყობინების გაგზავნას უკვე ერთ საათზე მეტია ვცდილობ...? რა სჭირს თქვენს აპლიკაციას?" — წერს Messager-ის შეწუხებული მომხმარებელი.

ჯერჯერობით, არც Facebook-ს და არც Messenger-ს გაუკეთებია განცხადება ამ ხარვეზების თაობაზე, თუმცა, ამასობაში მათმა იმედგაცრუებულმა მომხმარებლებმა უკვე სხვა პლატფორმებზე გადაინაცვლეს.