ჯანდაცვის მინუსტრის პირველი მოადგილის, თამარ გაბუნიას თქმით, ჩინური ვაქცინის შემოტანა საქართველოში ჯერ არ განიხილება, რადგან ის არაა აღიარებული არცერთი მკაცრი მარეგულირებლისა და WHO-ს მიერ.

"საქართველო ვაქცინაციის პროგრამისთვის ამ ეტაპზე განიხილავს მხოლოდ იმ ვაქცინებს, რომლებთაც აქვთ ან მკაცრი მარეგულირებელი ორგანოების ავტორიზაცია, ან WHO-ს მიერ პრეკვალიფიცირებულია. ამ ეტაპზე ჩინური ვაქცინა არც ერთი მკაცრი მარეგულირებლის მიერ არ არის აღიარებული და არც WHO-ს მიერ. ამ ეტაპზე რასაც განვიხილავთ, არის Pfizer-ის ვაქცინა, AstraZeneca და Moderna, რომელიც, ასევე, არის ის კანდიდატი ვაქცინა, რომელიც შეიძლება ქვეყანამ გამოიყენოს", — განაცხადა გაბუნიამ.

მისივე თქმით, დღესაც რომ იყოს საქართველოში Pfizer-ს ვაქცინა, მხოლოდ 3 ქალაქში (თბილისში, ქუთაისში და ბათუმში) არის ის ტექნოლოგიური შესაძლებლობები, (-80 გრადუსის მქონე მაცივრები), სადაც აღნიშნული ვაქცინის შენახვა შესაძლებელია.

რამდენიმე დღის წინ, ინფექციური პათოლოგიისა და შიდსის ცენტრის გენერალურმა დირექტორმა, თენგიზ ცერცვაძემ თქვა, რომ ქვეყანაში ორი ვაქცინის შემოტანა განიხილება — ასტრა ზენეკა და ერთ-ერთი ჩინური ვაქცინა.

8 იანვარს ჯანდაცვის მინისტრმა, ეკატერინე ტიკარაძემ განაცხადა, რომ შესაძლოა თებერვალში კოვაქს პლატფორმამ მოგვაწოდოს ვაქცინის გარკვეული დოზა, რომელიც რისკ ჯგუფებზე გადანაწილდება.

გაიგეთ მეტი: