13 ოქტომბერს ჟენევის საერთაშორისო მოლაპარაკებების 54-ე რაუნდი გაიმართა. საგარეო საქმეთა სამინისტროს ინფორმაციით, მოლაპარაკებებზე განხილულ საკითხებს შორის იყო უკანონოდ დაკავებული საქართველოს მოქალაქეების გათავისუფლება, ოკუპირებული ტერიტორიების დე ფაქტო ანექსია და ჰუმანიტარული პრობლემები. თუმცა, უწყებაში აცხადებენ, რომ საუბარი ვერ შედგა საქართველოს ოკუპირებული ტერიტორიებიდან იძულებით გადაადგილებული პირების და ლტოლვილების საკუთარ სახლებში უსაფრთხო და ღირსეულ დაბრუნებაზე.

"საკითხის განხილვის დაწყებისთანავე მონაწილეებმა მოსკოვიდან, სოხუმიდან და ცხინვალიდან სცადეს თემის პოლიტიზირება და დატოვეს მოლაპარაკებები", — აცხადებენ საგარეო საქმეთა სამინისტროში.

უწყების ინფორმაციით, მოლაპარაკებებზე საქართველოს წარმომადგენლებმა ისაუბრეს ცხინვალის რეგიონებში რუსეთის საპარლამენტო არჩევნების ჩატარებაზე, რაც "ნათლად მიუთითებს ანექსიის მიმდინარე პროცესზე". მოლაპარაკების დიდი ნაწილი შეეხებოდა ცეცხლის შეწყვეტის შეთანხმებას, ე.წ. ბორდერიზაციის უკანონო პროცესს, ცხინვალის რეგიონის მიმართულებით საოკუპაციო ხაზის ხანგრძლივი ჩაკეტვისა და ახალგორის მოსახლეობის იზოლაციას და ა.შ.

გარდა ამისა, ქართულმა დელეგაციამ მოლაპარაკებებისას ისაუბრა დავით ბაშარულის, გიგა ოთხოზორიასა და არჩილ ტატუნაშვილის მკვლელობის საქმეებზე მართლმსაჯულების აღსრულების საჭიროებისა და აფხაზეთის რეგიონში რუსეთის სამხედრო ბაზაზე ირაკლი კვარაცხელიას გარდაცვალების საკითხზე.

საგარეო საქმეთა სამინისტროს განცხადებით, მოლაპარაკებების ფარგლებში დაისვა აფხაზეთისა და ცხინვალის რეგიონებში ევროკავშირის სადამკვირვებლო მისიის (EUMM) შესვლისა აუცილებლობა. ასევე, მნიშვნელოვანი ყურადღება დაეთმო ბოლო 3 წლის განმავლობაში შეჩერებული გალის ინციდენტების პრევენციისა და მათზე რეაგირების მექანიზმის შეხვედრების ყოველგვარი წინაპირობის გარეშე, ფუძემდებლური პრინციპების დაცვით, აღდგენის აუცილებლობას.

საერთაშორისო მოლაპარაკებებზე საუბარი, ასევე, შეეხო ოკუპირებულ ტერიტორიებზე ადამიანის უფლებების კუთხით არსებული რთული ვითარებას, სამშვიდობო პროცესში ქალების ჩართულობის მნიშვნელობას, ოკუპირებულ ტერიტორიებზე არსებული კულტურული მემკვიდრეობის ძეგლების მდგომარეობას, კორონავირუსის პანდემიის პირობებში კონფლიქტის შედეგად დაზარალებული მოსახლეობის ჯანდაცვის სერვისებზე წვდომის აუცილებლობას და ა.შ.

ჟენევის მოლაპარაკებებზე ვრცლად ისაუბრებს ძალის არგამოყენებისა და უსაფრთხოების საერთაშორისო მექანიზმებზე.

"ქართველმა მონაწილეებმა აღნიშნეს, რომ საქართველომ არაერთხელ დაადასტურა ძალის არგამოყენების ვალდებულება და პირნათლად ასრულებს კიდეც ამ პირობას მაშინ, როცა რუსეთი განაგრძობს ქართული მხარის წინააღდეგ ძალის გამოყენებასა და ძალის გამოყენებით მუქარას", — აცხადებენ საგარეო საქმეთა სამინისტროში.

მოლაპარაკებების მორიგი რაუნდი 2021 წლის 7-8 დეკემბერს გაიმართება.


ჟენევის საერთაშორისო მოლაპარაკებები შექმნილია 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე. მოლაპარაკებები იმართება ევროკავშირის, გაეროსა და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.