რუსეთის ვეტერინარული და ფიტოსანიტარული კონტროლის ფედერალურმა სამსახურმა, რომელიც მოქმედებს როგორც სადამსჯელო ორგანო რუსეთის ფედერაციის არამეგობრული სახელმწიფოების მიმართ სავაჭრო სანქციების დაწესებისთვის, 15 ქართულ საწარმოს რუსეთში რძის პროდუქტების გატანის ნებართვა მისცა. ინფორმაციას სამთავრობო მედია Tass ავრცელებს.

"როსსელხორნადზორმა წამოიწყო EAEU-ს ქვეყნების საწარმოების რეესტრში შეყვანა, რომლებსაც აქვთ უფლება მიაწოდონ თავიანთი პროდუქცია კავშირის წევრ ქვეყნებს. ესენია აზერბაიჯანის ერთი, ასევე საქართველოს 15 საწარმო", — ნათქვამია უწყების განცხადებაში.

Tass-ის ცნობით, როგორც დეპარტამენტში განმარტავენ, ეს გადაწყვეტილება მის ხელმძღვანელ სერგეი დანკვერტს, საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელს, ზურაბ ჩეკურაშვილსა და სურსათის უვნებლობის თავმჯდომარეს შორის 5 მარტის მოლაპარაკების შედეგად მიიღეს.

ევროპეისკაია პრავდას ცნობით, რუსეთის მარეგულირებელი სამსახურის პრესსამსახური ირწმუნება, რომ შაბათს, უკრაინაში რუსეთის ქმედებების მიუხედავად, რუსეთის ფედერაციის, ბელორუსის, საქართველოსა და აზერბაიჯანის ვეტერინარული სამსახურების წარმომადგენლებს შორის მოლაპარაკებები გაიმართა.

საქართველოს სურსათის ეროვნული სააგენტო აცხადებს, რომ რუსეთთან მოლაპარაკებები 2020 წლიდან მიმდინარეობდა და ქართული პროდუქტის ექსპორტზე გატანის გადაწყვეტილებაც სწორედ ამის საფუძველზე იქნა მიღებული.

"სურსათის ეროვნული სააგენტო მოლაპარაკებებს აწარმოებს არაერთ ქვეყანასთან, მათ შორის, ერთი კვირის წინ წარმატებით დასრულდა მოლაპარაკებები საუდის არაბეთთან. 2020 წლიდან მოლაპარაკებები მიმდინარეობდა რუსეთის ფედერაციის მხარესთანაც, რომლის საფუძველზე, მიღებულ იქნა გადაწყვეტილება, ქართული ცხოველური წარმოშობის პროდუქციის ექსპორტის დაშვებასთან დაკავშირებით, რუსეთის ფედერაციასა და სხვა ქვეყნებში", — ნათქვამია განცხადებაში.


28 თებერვალს, პრემიერმინისტრმა ირაკლი ღარიბაშვილმა განაცხადა, რომ რუსეთის მიმართ დასავლეთის დაწესებული სანქციები ეფექტური საშუალება არაა. მისი თქმით, რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება". ხოლო, 25 თებერვალს მან განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ღარიბაშვილის განცხადებას 25 თებერვალს მოსახლეობისგან კრიტიკა მოყვა. პარლამენტის წინ მასშტაბური აქცია გაიმართა. მოგვიანებით ზელენსკიმ Twitter-ზე დაწერა, რომ არის დრო, როცა მოქალაქეები მთავრობაზე უკეთესები არიან და ქართველებს მხარდაჭერისთვის მადლობა გადაუხადა.

პირველ მარტს უკრაინის პრეზიდენტმა საქართველოდან უკრაინის ელჩი გაიწვია. ზელენსკი ამბობს, რომ მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლაა.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში