გოთიკისა და ვამპირული ჟანრის მოყვარულებს წინ ნამდვილად ამაღელვებელი შემოდგომა ელოდებათ — ვამპირების აკადემიის სერიალზე რომ არაფერი ვთქვათ, ლეგენდარული ამერიკელი მწერლის, ენ რაისის, კლასიკად ქცეული ვამპირის ქრონიკები ეკრანებზე კვლავ გაცოცხლდება. სერიალს, რომელზე მუშაობაც თითქმის 6 წლის განმავლობაში მიმდინარეობდა, მაყურებელი ოქტომბრის დასაწყისში იხილავს. მანამდე კი უკვე შეგვიძლია, ტრეილერს თვალი შევავლოთ.

შეგახსენებთ, რომ მსოფლიოში ერთ-ერთი ყველაზე გაყიდვადი წიგნების სერიის — ვამპირის ქრონიკების — პირველი ნაწილი, ინტერვიუ ვამპირთან, გასული საუკუნის 90-იან წლებში ჰოლივუდში აქციეს ბლოკბასტერ ფილმად, სადაც მთავარი როლები ბრედ პიტმა, ტომ კრუზმა და ანტონიო ბანდერასმა შეასრულეს. შესაძლოა, ამ უკვე საკულტო ფილმთან პარალელის გავლების ბრალია, რომ ენ რაისის მკითხველების ნაწილი ტრეილერით არცთუ კმაყოფილი დარჩა.

მწერლის ფანების ჯგუფში ინტერნეტმომხმარებლებმა უკმაყოფილებაც და აღშფოთებაც გამოთქვეს. ისინი აღნიშნავენ, რომ სერიალს რაისის ორიგინალურ ნაწარმოებებთან საერთო ბევრი არაფერი აქვს. მათი უკმაყოფილება კიდევ უფრო გაამძაფრა ავტორის შვილისა და პროექტის პროდიუსერის, ქრისტოფერ რაისის, განცხადებამ, რომ იგი "სერიალზე კომენტარს არ აკეთებს".

თავად ენ რაისი სერიალს არ მოსწრებია — გოთიკის ჟანრის დედოფლად მიჩნეული მწერალი გასული წლის დეკემბერში გარდაიცვალა. თუმცა, იგი თავდაპირველად აქტიურად იყო ჩართული პროექტის სამზადისში.

სერიალი ინტერვიუ ვამპირთან კომპანია AMC-მ გადაიღო. ამავე ბრენდს ეკუთვნის ცნობილი პროექტი მოსიარულე მკვდრები, რომელიც წელს სრულდება — შესაბამისად, რაისის რომანების ეკრანიზაცია სწორედ მას ჩაანაცვლებს. აღსანიშნავია, რომ AMC ავტორის წიგნების კიდევ ერთ ცნობილ სერიას, მეიფეირის კუდიანთა ცხოვრებას, აქცევს სერიალად.

ენ რაისის უკვე ჟანრის კლასიკად მიჩნეული რომანი, ინტერვიუ ვამპირთან, 1976 წელს გამოიცა. წიგნი 200 წლის ვამპირი ლუის შესახებ მოგვითხრობს, რომელიც თავის ცხოვრებაზე და მე-18 საუკუნის ახალ ორლეანში გატარებულ წლებზე ჟურნალისტს უყვება. რომანის მთავარი ანტაგონისტი, ლესტატ დე ლიონკური, მოგვიანებით წიგნების სერიის მთავარი გმირი ხდება.

ვამპირის ქრონიკები, რომელიც ჯამში 13 რომანს მოიცავს, მსოფლიოში 80 მილიონზე მეტ ეგზემპლარადაა გაყიდული. ის ლიტერატურაში ვამპირული ჟანრის ფენომენად მიიჩნევა.

სერიალის ინტერვიუ ვამპირთან პირველი სეზონის შვიდი ეპიზოდი 2 ოქტომბერს გამოვა.