45 არასამთავრობო ორგანიზაცია გერმანიის ელჩის, ჰუბერტ ქნირშის განცხადებას პასუხობს. ორგანიზაციები მნიშვნელოვნად მიიჩნევენ გერმანიის მხარდაჭერას საქართველოს დემოკრატიული განვითარების პროცესში, ამავე დროს, მათთვის გასაკვირია ელჩის შეფასებები.

"ბატონი ჰუბერტ ქნირში არასამთავრობო ორგანიზაციების პოზიციას სოფიო კილაძეზე პერსონალურ თავდასხმად აფასებს და პარალელს ავლებს პოლიტიკურ პარტიებს შორის არაჯანსაღ დაპირისპირებასთან. მისი თქმით, საერთაშორისო პარტნიორები აფასებენ სამოქალაქო საზოგადოების ორგანიზაციების ღირებულ საქმიანობას და არა ამ ორგანიზაციების "ამ დონემდე დაშვებას", — აღნიშნულია განცხადებაში.

როგორც NGO-ები განმარტავენ, მათი მათი განცხადება არა კილაძეზე პერსონალური თავდასხმა, არამედ სახელმწიფოს მიერ პრინციპების უგულებელყოფის შეფასებაა.

"გაკვირვებას იწვევს ბატონი ელჩის შეფასება, როცა ის სამოქალაქო სექტორის დასაბუთებულ კრიტიკას პოლიტიკურ პროცესებს უკავშირებს და ერთ ჭრილში განიხილავს. მსგავსი დამოკიდებულება საფრთხეს უქმნის სამოქალაქო საზოგადოების ორგანიზაციების შეუფერხებელ მუშაობას, განსაკუთრებით მაშინ, როცა სამოქალაქო საზოგადოების კრიტიკა მიემართება სახელმწიფოს მიერ ადამიანის უფლებებისა და დემოკრატიული სახელმწიფოს მართვის პრინციპების დარღვევას", — აღნიშნავენ არასამთავრობო ორგანიზაციები.

ერთი კვირის წინ ადამიანის უფლებებზე მომუშავე 52 არასამთავრობო ორგანიზაციამ გაეროს ბავშვის უფლებათა კომიტეტს მიმართა, რომ პარლამენტის დეპუტატი სოფო კილაძე ახალ წევრად არ აირჩიონ. ივნისის ბოლოს აღნიშნულმა კომიტეტმა 9 ახალი წევრი უნდა აირჩიოს.

მონაწილე სახელმწიფოები კომიტეტის მომავალ კანდიდატებს გამჭვირვალე და ღია კონკურსის წესით არჩევენ და წარუდგენენ კომიტეტს. საქართველომ კომიტეტის წევრობის კანდიდატად პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარე, სოფიო კილაძე წარადგინა.

არასამთავრობო ორგანიზაციებს მიაჩნიათ, რომ კილაძე არ უნდა აირჩიონ კომიტეტის წევრად, რადგან მისი კვალიფიკაცია, რეპუტაცია და შერჩევის პროცესში გაეროს რეკომენდაციების დარღვევა ამის საფუძველს არ იძლევა.

სამოქალაქო სექტორის წარმომადგენლები ასევე ამბობენ, რომ სოფიო კილაძესთან დაკავშირებით სახეზეა ინტერესთა კონფლიქტი, რის გამოც ის ვერ ჩაითვლება დამოუკიდებელ კანდიდატად. ამის მიზეზი კი ისაა, რომ შერჩევის დროს და ახლაც ის პარლამენტის დეპუტატია, რის გამოც არ შეიძლება ჩაითვალოს, რომ მმართველი გუნდის წარმომადგენელი დამოუკიდებელი კანდიდატია. ერთ-ერთ პრობლემურ საკითხად ორგანიზაციები ასევე გამოყოფენ სოფო კილაძის სამოქალაქო სექტორთან ურთიერთობას.

არასამთავრობო ორგანიზაციების აღნიშნულ განცხადებას გამოეხმაურა გერმანიის ელჩი. თავის წერილში ის სოფო კილაძის შესახებ მიმართვის გამო არასამთავრობო ორგანიზაციებს აკრიტიკებს.

"ნება მომეცით, გამოვხატო ჩემი წუხილი ბრალდებების მიმართ, რომელიც საქართველოს კანდიდატის სოფო კილაძის მიმართაა წაყენებული. სამწუხაროდ, როგორც ვიცით, პირადი სახის შეტევა პოლიტიკური პარტიების მხრიდან ხშირად ხდება განსაკუთრებით საქართველოში, სადაც პოლიტიკური ლანდშაფტი უკიდურესად პოლარიზებულია. რაც შეეხება სამოქალაქო ორგანიზაციებს, საერთაშორისო პარტნიორები აფასებენ მათ მიერ გაწეულ ღირებულ შრომას ნაცვლად ამ დონემდე დაშვებისა.

გთხოვთ, ასევე გვენდეთ, რომ ჟენევის მისიას საკმარისი ინფორმაცია აქვს ამ და სხვა საელჩოებისაგან იმისთვის, რომ თითოეულ წარდგენილ კანდიდატზე წარმოდგენა შეექმნას

მადლობელი ვიქნები, თუ ჩემს შენიშვნებს ორგანიზაციებს წარუდგენთ, რომელბმაც განცხადებას ხელი მოაწერეს", — აცხადებს გერმანიის ელჩი.