პენიტენციურმა სამსახურმა მიხეილ სააკაშვილს სასამართლო სხდომაზე დასწრებაზე უარი უთხრა. უწყება ამის მიზეზად იმას ასახელებს, რომ შესაძლოა სასამართლო დარბაზში ესკორტირებისას მოხდეს დესტრუქციული ხასიათის ქმედება. მათივე თქმით, სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება კი წარმოადგენს დამატებით რისკს მისი ჯანმრთელობისთვის. თუმცა, გუშინ მისმა ექიმმა აღნიშნა, რომ ის პროცესზე დასწრებას შეძლებს.

შესაძლო დესტრუქციის მოლოდინებს პენიტენციური სამსახური სუს-ის ბრიფინგით ხსნის. მათი განცხადებით, რადგან მოსალოდნელი იყო სააკაშვილის პენიტენციურ დაწესებულებაში ეტაპირებისათვის ხელის შეშლა, მსგავს ქმედებებს შესაძლოა ადგილი ჰქონდეს მისი სასამართლო დარბაზში ესკორტირების შემთხვევაშიც

"სახელმწიფო უსაფრთხოების სამსახურის წარმოებაშია სს საქმე, დანაშაული, გათვალისწინებული სსკ-ის 315 მუხლის პირველი ნაწილით, სახელმწიფო უსაფრთხოების სამსახურის მიერ საჯაროდ გავრცელებული განცხადებით კი ცნობილი გახდა, რომ იგეგმებოდა მ. სააკაშვილის პენიტენციურ დაწესებულებაში ეტაპირებისათვის ხელის შეშლის მიზნით, დაწესებულებასთან მისასვლელი საავტომობილო გზების ბლოკირება, რიგი პოლიტიკური პარტიების წარმომადგენელთა საკუთრებაში არსებული ავტომანქანების საშუალებით. მათ განზრახული ჰქონდათ აღნიშნული დესტრუქციული ხასიათის მოქმედებების განხორციელება, რომელშიც მონაწილეობას მიიღებდა დაახლოებით 500-600 ავტომანქანა, რაც გამოიწვევდა უკონტროლო სიტუაციას, ქაოსსა და შექმნილი ვითარება ხელს შეუშლიდა მიხეილ სააკაშვილის ეტაპირების პროცესს. აღნიშნული სახის ქმედებებს შესაძლოა ადგილი ჰქონდეს მისი სასამართლო დარბაზში ესკორტირების შემთხვევაშიც.

ასევე, ბრალდებულ/მსჯავრდებულ მ. სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება წარმოადგენს დამატებით რისკს მისი ჯანმრთელობისთვის", — ვკითხულობთ სუს-ის განცხადებაში.

განცხადების დასასრულს უწყება ამბობს, რომ ზემოაღნიშნულის გათვალისწინებით, უწყება "მოკლებულია შესაძლებლობას მოახდინოს სააკაშვილის თბილისის საქალაქო სასამართლოში წარმოდგენა".

ადვოკატებისა და თავად სააკაშვილის მოთხოვნაა, რომ ის პროცესს დაესწროს. იუსტიციის მინისტრის, რატი ბრეგაძის რეკომენდაცია კი იყო, რომ ექსპრეზიდენტის პროცესი პენიტენციურ დაწესებულებაში ჩატარებულიყო.

სააკაშვილის ადვოკატმა, ბექა ბასილაიამ თქვა, რომ საქალაქო სასამართლომ მოითხოვა, სააკაშვილის პროცესი სასამართლოშივე შედგეს და დაესწროს თავად ექსპრეზიდენტიც. მან ასევე აღნიშნა, რომ იუსტიციის სამინისტრო და პენიტენციური ვალდებულები იყვნენ ეს მოთხოვნა შეესრულებინათ.


8 ნოემბერს მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს ისე, რომ უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო ექსპრეზიდენტი.

ნინო ლომჯარიას განცხადებით, სააკაშვილს რუსთავი ციხეში უთხრეს, რომ სამოქალაქო კლინიკაში უნდა გადაეყვანათ, ამიტომ ბადრაგებს გაჰყვა. მისივე თქმით, როცა მიხვდა სად მიიყვანეს, გააპროტესტა და მანქანიდან ძალით გადაიყვანეს. პენიტენციური ამტკიცებს, რომ სააკაშვილი ძალით არავის წაუყვანია და ამის დასამტკიცებლად, რუსთავის ციხიდან გამოსვლის კადრები გაავრცელა.

სააკაშვილი ამბობს, რომ ციხეში შეყვანისას მასზე იძალადეს, იუსტიციის მინისტრი კი ამტკიცებს, რომ თავად სააკაშვილმა იძალადა ციხის თანამშრომლებზე. დაწყებულია ორი გამოძიება — ინსპექტორი სააკაშვილისადმი შესაძლო არაადამიანურ მოპყრობას იძიებს, ჩანიშნულია ექსპერტიზა; იუსტიციის გენერალური ინსპექცია კი სააკაშვილის მიერ პენიტენციურის ნივთის დაზიანებას და თანამშრომლებზე შესაძლო ძალადობას.

სააკაშვილის ციხეში შეყვანის შემდეგ, პატიმრები ფანჯრებიდან მას აგინებენ და ემუქრებიან. სახალხო დაცმველის და სახელმწიფო ინსპექტორის წარმომადგენლები აცხადებენ, რომ ექსპრეზიდენტის პალატაში ეს ხმები ისმის. ადვოკატები ამას ფსიქოლოგიურ ზეწოლად აფასებენ.

სააკაშვილი უარს ამბობს ციხის სამედიცინო მომსახურებაზე. მისი ექიმის თქმით, ექსპრეზიდენტს რამდენიმე დღეა ტესტები არ გაუკეთებია, არ იციან სასიცოცხლო მაჩვენებლები რამდენი აქვს. მისივე თქმით, მდგომარეობა მძიმდება.

ამავე თემაზე: